Agnete Brun

Boka "Hvite striper, sorte får" av Øistein Monsen og Torgeir P. Krokfjord blei utgjeven i slutten av oktober 2025 og fekk stor merksemd og skapte debatt. Freistnad på å stoppe utgjevinga gjennom rettslege skritt fekk ikkje medhald i Oslo tingrett.

Dei to erfarne gravejournalistane skriv om korleis Marius Borg Høiby og omgangskretsen hans kan koblast til nokre av Europas mest notoriske narkogjengar, og at dette, etter forfattarane si meining, har vore omtala som ein open hemmelegheit i politiet. I sentrum av hendingane er eit kvitt stoff, med ein kilopris på ein million kroner - kokain.

På Ålesund bibliotek møter forfattarane publikum for å fortelje om arbeidet bak boka, dele kva dei har avdekka, og svare på spørsmål om kritikken som har fylgt utgjevinga. Samtalen med dei to vert leia av NRK- journalist Pål Kristian Lindseth.

Forfattarane bak boka er: 

• Torgeir P. Krokfjord. Han har jobba som undersøkjande journalist i Dagbladet sidan 2008. Han har vunne Skup-diplom og Den store journalistprisen.
• Øistein Norum Monsen. Han har jobba som undersøkjande journalist og fotograf sidan 2006. Som Dagbladet-journalist har han vunne IR-prisen og Data-Skup.

Arrangementet finn stad ved Ålesund bibliotek torsdag 5. mars kl. 19.00. Det er gratis og ope for alle.