Dette er ei moglegheit for alle til å bli betre kjent med dei store klassikarane i litteraturen. I prosjektet “Månadens klassikar” vil vi presentere ei bok i månadene her på heimesida. Vi lagar også ei utstilling med månadens verk og andre bøker eller medium som høver, i biblioteka. I løpet av månaden vil vi også ha små eller store arrangement knytt til boka. Det kan være miniføredrag om boka og forfattaren, samtaler der vi diskuterer boka, quiz, høgtlesing, filmvisning eller anna. 

Vi startar i oktober med Knut Hamsuns Markens grøde (1917). Det er vår eminente bibliotekar Anne Marit Huse som presenterer denne boka. Andre bøker vi presenterer i haust er Skyggekvinner av Fumiko Enchi og ??? På nyåret kan vi freiste med bøker av Roald Dahl, Arne Garborg, Thomas Mann, Tove Jansson.

I tillegg til presentasjonen av Markens grøde på heimesida og i biblioteka, vil Moa bibliotek også ha eit arrangement rundt boka torsdag 22. oktober. Då vil bibliotekar har ein noko lengre presentasjon av forfattaren og verket, og det blir høgtlesing og musikk. Til slutt blir det quiz, der vinnaren kan sikre seg to kinobilletter til Odeon kino. 

Månadens klassikar i oktober: Markens grøde av Knut Hamsun

Markens grøde er ein roman av den norske forfattaren Knut Hamsun. Den vart utgitt for første gong i 1917 og det var for denne romanen at Hamsun fekk nobelprisen i litteratur i 1920.

Romanen startar ikonisk med at Isak ber på ei bør og går innover i eit veglaust og udyrka terreng ein stad i Nord-Norge. Han er ein taus og sterk mann som berre har seg sjølv og kreftene sine å stola på. Han finn plassen sin, set opp ei enkel jordgamme og byrjar det harde arbeidet med å bryta jorda. 

Han får etter kvart selskap av Inger, som han giftar seg og får barn med. Når eit av borna, til liks med Inger, vert fødd med misdanninga hareskår (leppe-gane-spalte), blir Inger så fortvila at ho drep det nyfødde barnet. Ugjerninga vert oppdaga og Inger får eit langt opphald på tukthus i Trondheim.

Hamsun skreiv romanen under den første verdskrigen, noko som farga historia med ein djup kritikk av det moderne, kaotiske samfunnet. Opninga peikar mot eit ideal om sjølvberging og ein retur til det ekte, naturlege livet.

Romanen har også blitt lest som innlegg i debatten om straff for barnedrap som Hamsun tok aktivt del i.

Markens grøde er ein av dei mest kjente og leste romanane i norsk litteratur, den kjem stadig i nye utgåver og opplag og er jamt på utlån i biblioteket. Den vart filmatisert som stumfilm allereie i 1921 og i slutten av oktober 2026 kjem ei ny filmatisering av regissør Hans Petter Moland.